Minningaöldur sjómannadagsins heitir minnisvarði sem Sjómannadagurinn í Reykjavík og Hafnarfirði hefur reist vestan Fossvogskirkju við hlið minnisvarðans um óþekkta sjómanninn. Hann er gerður úr tilsöguðum grásteini og myndar fjórar öldur. Á sléttum flötum Minningaaldanna verður komið fyrir nöfnum sjómanna og sæfarenda sem drukknað hafa og ekki fundist né komist í vígða mold.

 

Minningaöldurnar og vitinn eru gerð í Steinsmiðju S. Helgason í Kópavogi. Arkitekt er Halldór Einarsson.

 

Á hverjum sjómannadegi er lagður blómsveigur á leiði óþekkta sjómannsins. En það svarar ekki öllum viðhorfum sem uppi kunna að vera. Guðmundur Hallvarðsson formaður sjómannadagsráðs hefur greint frá því að til hans hafi komið ættingjar nafngreindra sjómanna sem farist hafa og spurt: Hvar og hvernig geta aðstandendur minnst þeirra sem í hinni votu gröf hvíla? Minningaöldur sjómannadagsins eru svar við spurningum af þessu tagi.

Á sjómannadaginn síðasta, 6. júní 1996, voru Minningaöldurnar vígðar við hátíðlega athöfn. Letruð eru á minnisvarðann nöfn 12 skipverja sem fórust með vitaskipinu Hermóði 18. febrúar 1959 og 2 sjómanna er fórust með m.b. Pólstjörnunni ST-33, 17. desember 1977. Á stalli Minningaalda sjómannadagsins er áletrun úr Gamla testamentinu, Jesaja spámanni, 43. kafla, 1. versi: "Nú segir Drottinn svo, sá er skóp þig: Óttast þú eigi, því að ég frelsa þig með nafni, þú ert minn."

Aðstandendur, ættingjar og útgerðir geta óskað eftir því að nöfn sjómanna verði letruð á minnisvarðann. Stjórn Sjómannadagsins í Reykjavík og Hafnarfirði veitir gegn gjaldi heimild til skráningar í samræmi við reglugerð um Minningaöldur sjómannadagsins sem staðfest var 18. júní 1996.